Jdt 15

Ol Israel i win

1 Ol soldia bilong Asiria i stap long ol haus sel bilong ol, na taim ol i harim tok long samting i bin kamap long Holofernes, ol tu i kirap nogut tru. 2 Ol i pret na guria na ol i no wet. Nogat. Wantu ol i ranawe i go, na ol i bihainim ol kain kain rot i stap long ples stret na long ol maunten. 3 Ol lain i bin sindaun antap long ol maunten nabaut long taun Betulia, ol tu i ranawe. Na olgeta soldia bilong Israel i kam daun hariap na i ranim ol i go.

4 Usia i salim toksave i go long ol ples Betomastaim na Bebai na Koba na Kola na long olgeta hap bilong Israel. Em i tokim ol long ol samting i kamap pinis, na em i askim ol long kirapim pait long ol dispela birua na pinisim ol. 5 Ol Israel i harim dispela tok, orait olgeta ol i kirap pait wantaim ol birua. Ol i ranim ol i go inap long Koba na ol i kilim ol i dai. Ol man bilong Jerusalem na bilong ol maunten ol tu i kam, long wanem, ol i bin harim nius long ol dispela samting i bin kamap long kem bilong ol birua. Na ol man bilong distrik Gileat na Galili i banisim ol Asiria na ol i bagarapim ol tru. Ol i ranim ol i go inap long taun Damaskus na i go moa yet.

6 Ol manmeri i stap yet long Betulia, ol i go daun long kem bilong ol Asiria na ol i kisim ol gutpela samting ol soldia i bin lusim i stap long kem. Ol i karim planti samting i go bek long taun. 7 Taim ol soldia bilong Israel i kam bek long pait, ol tu i go long kem na ol i mumutim ol samting i stap yet. Ol manmeri bilong ol taun na ples i stap long ples maunten na long ples stret, ol tu i kisim planti samting, long wanem, ol kain kain gutpela samting i pulap tru long kem bilong ol Asiria.

Ol Israel i givim biknem long Judit

(Sapta 15.8—16.25)

Ol Israel i amamas

8 Orait hetpris Joakim na ol lida bilong Israel i lusim Jerusalem, na ol i kam bilong lukim ol gutpela samting God i bin mekim bilong helpim ol Israel. Na tu ol i kam bilong lukim Judit na amamasim em. 9 Na taim ol dispela man i bungim Judit, olgeta wantaim i litimapim nem bilong em na ol i tok olsem, “Yu givim biknem long Jerusalem. Yu nambawan meri tru bilong Israel. Mipela i amamas tru long yu. 10 Yu wanpela tasol i mekim ol dispela samting. Yu tasol i mekim Israel i win gen. Na God tu i amamas long dispela wok bilong yu. God I Gat Olgeta Strong i ken mekim gut long yu oltaim.” Na olgeta manmeri i bekim tok olsem, “I tru.”

11 Inap long 30 de ol manmeri i wok long mumutim ol samting long kem. Olgeta samting bilong Holofernes ol i givim long Judit, em haus sel bilong en na ol dis na plet silva na ol bet na ol kap na ol tebol na sia na olkain samting olsem. Judit i kisim ol dispela samting na em i pasim long donki bilong em na i redim tu ol karis na em i hipim ol samting i go antap. 12 Olgeta meri bilong Israel ol i kam bilong lukim em. Ol i givim biknem long em na litimapim nem bilong em, na sampela i danis i go pas long em. Judit yet i kisim sampela han bilong diwai na i givim sampela long ol meri i poromanim em. 13 Na em wantaim ol dispela meri ol i raunim ol lip oliv, na i putim long het bilong ol. Na em yet i go pas long ol meri long wanpela singsing danis. Na ol soldia bilong Israel i holim ol samting bilong pait, na ol tu i putim bilas long het, na ol i bihainim ol meri na ol i singim ol song bilong amamas.